محمد حمدان يكتب :-
الحمد لله معندناش نظرية المؤامرة ولا هنقول كلام عشان نثبت بيه صحة وجهة نظرنا لكن الواقع بيقول أن ف أمور حدثت على مدار الموسم ده كانت عواقبها ولازم تكون النهاية غير ايجابية طالما البدايات كانت مليئة بالسلبيات.
أسلوب تكتيك…
الأهلى بدأ الموسم بدايه ولا اروع وغير طريقه اللعب ولعب 343 الطريقه الجديدة على الكرة المصرية فى المواسم الأخيرة واللى كان بيلعبها الأهلى ايام مانويل جوزيه وايام حسن شحاته …..
والحقيقة الطريقه ده اتت بثمارها لأنها حررت أهم مفتاح لعب عندك وهو على معلول واعطت حرية حركة الجناحين يضموا للداخل عشان كده بانت خطورة الشحات وعبدالقادر وتاو فى أول 7 مباريات فى الموسم حتى فى كأس العالم للأندية ….
بعدها قرر العبقرى يغيرها ل 4231 و 433 وهنا غابت الجبهة الشغاله واصبح الأهلى بلا اجنحه خصوصا فى ظل ثلاثى وسط بيلعبوا فلات فأصبح عندنا كثافه عددية فى وسط الملعب ولكن دون فائدة …
وتغيير الطريقه كتير بيعمل تذبذب فى المستوى وده اللى شفناه فى أداء الأهلى فى الدورى وفى بطوله افريقيا يعنى ممكن تلاقى الأهلى بشكل فى أفريقيا وفى الدورى بشكل تانى خالص .
معنويا ونفسيا وعلى مستوى الكره.
موسيمانى أخطأ فى تعامله مع كهربا إللى أشاد بمستواه كل شخص موجود فى النادى بداية من الخطيب مرورا بمدير الكرة والمدرب العام وبرحيل كهربا أصبح الأهلى بلا اجنحه ومفيش غير جناح واحد اللى شغال ( احمد عبدالقادر ) واللى لما بيغيب بيكون الأهلى مكسور الجناح .
محمد محمود جاهز فنيا وطبيا وبدنيا وتم تهميشه بلا سبب مقنع لمجرد أن الأهلى يمتلك 3 لاعبين فى وسط الملعب ولم يعى موسيمانى أن كرة القدم غدارة وفى ثانية ممكن تلاقى الثلاثه إما مصابين أو مجهدين أو خارج نطاق الخدمه بسبب ضغط المباريات.