أخبار عاجلة

الست فتحية بخنس

كتب: محمد البربري

ولأن كل حاجة من حولينا اتشقلبت العلاقات بقت أون لاين والخلافات سوشيال ميديا والزعل بلوك والضحك ايمو والكتابة عربى بحروف انجليزى وسموه فرانكو عرب ويتقال عليك روش لما تكتب .
قررت الست فتحية الانقلاب هي كمان بس على السيد موظف السجل المدني ” اللي كل طموحه يبقى مرتبه حد أدنى أو حتى حد برام “وسمت نفسها فوفا مش بس كدة لا دي كمان عزلت من شقتها الملك في الوايلى وباعت العمارة بالكامل اللي ورثتها عن المرحوم بخيت بخنس أبوها علشان تشترى شقة في كومباوند في التجمع.
الست فتحية أسف مدام فوفا مش أكتفت بتغيير اسمها هي وبس لا كمان غيرت اسم جوزها وخلته تيتو بدل من عم عطية اللى انقلب هو كمان على القهاوى وابتدى يقعد على كافيهات وبقى يطلب هوت شوكلت بدل ما يقول كاكاو وصاحب دودى اللى هو أصلا كان اسمه الحاج داوود اللى كان بيطلب الشاي كشرى سكر بره ودلوقتى بيطلبوا شاى تى باج وايرل جراى .
مدام فوفا بتفطر دلوقتى بينز اللي هو فول مع باتون ساليه اللي أساسا اسمه بقسماط وبتغدى ولادها جرين سووب ملوخية يعنى، وعلى العشا بنتها ليليان اللى اسمها في بطاقة الرقم القومي خديجة بتعملهم شوجر كريب والترجمة فطيرة سكر .

والحكاية مش حكاية فوفا وبس ، النهاردة البلد كلها مدام فوفا بس بأسماء مختلفة عائشة شوشو وعايدة جايدة ، رانيا بقت هانيا وياسمين بيقولوا جاسمن دا حتى الواد عباس بن الحاجه دهبيه المستريح سمى نفسه بيسو وعمل أكونت علي الفيس بوك بيسو العاشق .
والمصيف بقى ساحل ، والبنت بقت رجولة والراجل بقى مز ، التدين تخلف والتقاليد رجعية ، والعرى حرية ، والحداد دلوقتى بروفايل أو بوست على الفيس وممكن شريط على قناة رقص أو نعى في موجة كوميدى ، دى حتى الحرنكش دلوقتى سبحان الله ولا حول ولا قوة الا بالله اسمه جولدن بيرى .
وخلاصة الكلام احنا يا سادة الدولة اللي الزمن لو رجع بيها لورا طلعت هي قدام .
وعلى الهامش :-
الوطن مش نشيد بلادي، الوطن عيش حرية عدالة اجتماعية، الوطن مش أغنية في ماتش كورة، الوطن مش علم في البلكونة، الوطن تعليم كويس، سرير في مستشفى، باختصار الوطن أكبر من أي شعار وأي نظام.

عن بسمة

شاهد أيضاً

السيسي ومعركة الوعي

زينب المصري تكتب: السيسي ومعركة الوعي قام الرئيس السيسي  بتجهيز الجيش وتطويره  ليصبح من اقوي …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: